【明報專訊】本港首富、長和系主席李嘉誠又做善事喇，為紀念已故友人、匯豐前大班沈弼勳爵（Michael Sandberg），特別撥出500萬元成立基金，資助本港文憑試（DSE）學生赴英讀書。

1970至1980年代叱咤金融界嘅匯豐銀行前主席沈弼，今年7月2日離世，享年90歲。為咗紀念呢位對香港貢獻良多嘅故友，李嘉誠特別撥出500萬設立「李嘉誠基金會沈弼勳爵紀念獎學基金」，資助成績優異嘅香港DSE學生，到英國兩間指定大學修讀學士課程。獎學基金喺未來10年按年頒授，兩家大學將諮詢沈弼家族嘅意見，並會根據學生成績同需要，每年各甄選出兩至三名獎學金得主。

李嘉誠話沈弼喺香港服務多年，位居要津，對香港今日可以發展成為國際金融中心功不可沒；佢當年多次喺英國為港發聲，同埋支持香港商界發展機遇，所以藉住呢個獎學基金懷緬摯友，紀念佢喺香港同英國兩地嘅卓越成就。