【明報專訊】街工梁耀忠兩年前寫咗本書《我固執而持久地，過這種生活》，講述佢從中學到投身議會嘅經歷。雖然書賣得唔錯，不過據聞有唔少讀者投訴呢本書字太多，有啲悶喎。今年阿忠將呢本書再版，加咗唔少相片，當中一張係有歷史價值嘅，就係佢因為「臭罌出臭草」呢句話而被人趕出會議廳後喺攝影室影嘅。今年阿忠仲有本新書《人生五味》，記載綽號「花柳全」重犯何毓桓喺監獄嘅故事。