【明報專訊】民主黨立法會議員林卓廷被指喺5月立法會審議《逃犯條例》修訂草案時，違反《立法會(權力及特權)條例》第19（a），早前畀警方預約拘捕。阿廷近日都係喺立法會過夜，話要堅持喺「案發位置」等警方入立法會拘捕佢。警方以「地點敏感」為由，無入立會拉人，但就打電話畀阿廷，叫佢今日下晝去東區裁判法院應訊。阿廷話自己尊重法庭，所以會去法院應訊，但話警方做法係「由預約拘捕變成預約檢控」。