【明報專訊】周二中槍嘅中五生曾志健（健仔）留醫伊利沙伯醫院，唔少熱心市民去探佢。喺將軍澳做飲食業嘅楊先生趁「落場」去醫院探健仔，仲帶埋個蜜瓜同一張寫有「好人一世平安」嘅心意卡畀佢。佢話警察向心口開槍係蓄意謀殺，事後仲話射膊頭，問警察「夜晚瞓唔瞓得着」，仲話次次聽到警察解釋「電光火石」都好想講粗口。佢話專登過嚟係代佢剛出世嘅囝囝向健仔講多謝，感謝健仔為佢下一代嘅未來付出。