【明報專訊】好多餐廳食肆會主動為客人派餐紙巾同濕紙巾，唔覺意都可能造成浪費，基督教家庭服務中心一個網上訪問，1330名15歲以上受訪市民中，七成受訪者認為食肆毋須主動派紙巾，可按個別顧客要求派發。中心又統計受訪者人均紙巾用量，就算唔計廁紙，原來每人每日都用8張紙巾（包括袋裝、盒裝紙巾、濕紙巾、抹手紙及餐紙），以2018年底全港15歲以上人口656.1萬推算，即係港人每日用咗近5000萬張紙巾，都相當驚人。