【明報專訊】民建聯立法會議員蔣麗芸（Ann姐）過去成日要求政府成立「嬰兒基金」，希望政府同父母一齊幫小朋友儲錢，紓緩跨代貧窮問題，爭取一直未見成果，但Ann姐踏入豬年就諗到用另類方法鼓勵小朋友儲錢，就係落區派豬喇！Ann姐噚日舉行新春團拜，趁機介紹部分地區幹事畀大家認識，仲預告將會落區派豬嘅大計，原來佢已入手約800個豬仔錢罌，下周一起將喺九龍西區內派畀學童，Ann姐仲打算幫小朋友達成願望𠻹呀！