【明報專訊】新民黨立法會議員容海恩（Eunice）今個月就會同該黨嘅政策總裁袁彌昌拉埋天窗，成為立法會首名任內結婚嘅女議員，政圈更盛傳佢係雙喜臨門，有咗BB。新民黨噚日同特首林鄭月娥會面提交《施政報告》建議，Eunice以平底鞋同黑色西裝外套打扮現身，動作靈活，仲彎腰執起放喺地下嘅文件夾𠻹。被記者追問身體情况，Eunice笑住話﹕「冇咩近况呀，大家都知道。」咁係咪好快做媽媽呢？佢話遲啲有結婚相會畀大家；至於預產期係幾時，佢繼續答非所問，笑住話「冇呀，𠵱家放暑假囉！冇回應呀！」