【明報專訊】香港發展得好快，現時同40年前嘅香港，都已經有天壤之別。政府檔案處網頁噚日上載咗70幅1970年代中期彌敦道建築物同街景嘅照片，唔知大家睇相，仲認唔認得呢啲地方係現時嘅邊個位置呢？政府今次上載嘅相，記錄咗曾經家傳戶曉嘅商號，例如、「平霸」（仲記唔記得個廣告，鄧英敏大叫「唔係最平唔敢稱霸，彩色電視，平霸啦！冷氣機，平霸啦！雪櫃，平霸啦！）、普慶戲院、「泰林」等。泰林係一間電器公司，1946年創立，但係去到2008年就全線結業，相信後生一代好多都唔識得上述老字號喇。不過，有相中嘅建築物至今仍屹立不倒，好似循道衛理聯合教會九龍堂。