由富二代、建制二代等人士組成嘅香港菁英會，噚日喺會展舉行第9屆執委會就職典禮，由全國政協委員盧文端個仔盧金榮連任主席、莊士集團太子爺莊家彬擔任常務副主席，特首梁振英（前排右）、中聯辦主任張曉明（前排中）、以及多名高官、新任議員都係座上客。梁振英致辭時話，樂見青年熱心社會，歡迎對政府工作多提意見，又透露會出席今年尾嘅「青年高峰會議」，同青年交流，呼籲大家踴躍參與政府委員會及諮詢組織工作。祝酒儀式上發生小插曲，負責祝酒辭嘅嘉賓誤將「祖國」講成「祖腳」，引來全場笑聲。（曾憲宗攝）