【明報專訊】立法會會期7月即將結束，議員都要向選民報告議會工作。經民聯多名議員，包括主席梁君彥、副主席林健鋒、盧偉國及梁美芬等噚日就喺中環鬧市向市民派發會刊《經民天地》。新一期嘅經民天地印咗萬幾本，會喺商會同地區派發，會刊除咗有經民聯動向，仲有各議員嘅專訪，大賣佢哋溫情一面。例如林健鋒貢獻咗1980年代初喺大陸「開荒」嘅珍藏相，講當年返大陸做生意經歷。佢話，當年上大陸無冷氣又要餵蚊，無人想去，不過去咗先知好正，成功搭上內地經濟「頭班車」。佢勸告年輕人，要勇於嘗試向外闖。