【明報專訊】東涌一直有「買餸難」嘅問題，有街坊話，喺領展旗下逸東街市買到嘅一餐餸價錢，等於荃灣楊屋道街市兩餐，逸東街市月中起裝修3個月，街市得番15檔商戶，更令街坊擔心買餸再貴啲之外，仲應唔應付到邨內4萬居民需要。有社區團體喺上周五同周六用問卷訪問逾200名逸東邨及附近居民，逾九成支持區內設立由政府管理嘅街市；團體仲喺噚日舉辦「臨時街市體驗日暨逸東邨居民大會」，聽意見之餘，索性令街坊體驗「自己街市自己開」。工聯會鄧家彪、街工梁耀忠、民主黨區議員郭平同社民連副主席黃浩銘「跨黨派」撐場。