【明報專訊】香港發展商賣樓一向多花款，名人效應更係以往最常見招數。好似信置（0083）咁，早排就請咗憑一系列《巾幗梟雄》劇集而成為近年電視史上最佳拍檔嘅視帝黎耀祥（右二）同視后鄧萃雯（左二），幫成都「信和．御龍山」做宣傳。黎耀祥、鄧萃雯一向係公認嘅好戲之人，《巾幗梟雄》等劇，亦令佢哋喺內地爆紅，發展商就係睇中佢哋人氣高，早排為樓盤舉行酒會時，除咗招待唔少成都當地有錢人之外，更特登請佢哋嚟做宣傳，黎、鄧兩人更喺信和集團中國項目聯席董事陳秉剛（右一）陪同下了解項目，不過，對於兩人有無買到個呢個盤，信和方面始終唔肯回應。