【明報專訊】最近城中話題非大熊貓莫屬，除咗可以四圍見到大熊貓雕塑，𠵱家搭港鐵都可以見到大熊貓。事關港鐵公司由即日起至出年2月期間推出「大熊貓暢遊MTR」宣傳同活動，當中海洋公園站會化身成為大熊貓主題車站，車站唔同角落佈滿海洋公園內嘅6隻大熊貓，包括盈盈、樂樂、安安、可可同埋一對龍鳳胎熊貓BB。

而被稱為「超級轉車站」嘅金鐘站，都會有6隻大熊貓嘅圖案，候車大堂嘅LED圓柱會播放3D大熊貓出沒片段，大熊貓仲會「伸手」同乘客打招呼；另外有10個高人流車站會有「打卡位」，每個「打卡位」嘅熊貓造型都按地區特色設計。

除咗主題車站，有兩列南港島線同埋一列機場快線列車會變身主題列車，車廂內會佈滿大熊貓圖案；至於高鐵版本就會喺下個月啟航。

此外，港鐵喺各站都換上「鐵仔」同大熊貓主題嘅節日裝飾，仲會有「鐵仔」、「機鐵仔」同埋「高鐵隊長」喺唔同車站「快閃」，向乘客派大熊貓主題嘅禮物。