【明報專訊】港大學者、病毒與疫苗研究中心總經理及科學總監袁國勇噚日出席新發病毒診斷公司活動，致辭提到疫症全球大流行必然再發生，必須做好準備，仲話1997年禽流感時，佢問某官員可唔可以資助做研究，對方話唔使做，因為啲雞已死晒。

近期日本出現新冠及流感疫情同時大爆發。袁國勇一再提醒大家要為疫症大流行準備，「唔好以為過咗新冠（疫情）無事，唔係，最記得當年1997年禽流感，殺晒啲雞。我問政府某官員，可唔可以畀啲錢做禽流感研究，佢點講呀？唔講得個（官員）名，『啲雞死晒啦，唔使做啦』」。但袁話病毒會傳開去，候鳥同蝙蝠係會周圍飛。

本地創科企業新發病毒診斷成功研發全自動多重診斷系統，同時檢測超過40種病毒、細菌及真菌，噚日公司宣布通過審批列入衛生署本地醫療儀器製造商列表及醫管局認可供應商。