【明報專訊】翼龍最早生活喺2億2500萬年前，橫跨三疊紀至白堊紀末期，係最早識得飛嘅脊椎動物，其尾部由一條長形骨質尾巴同神秘軟組織「尾翼」所組成（圖1右方紅色部分，中大提供）。過往研究員一直都解唔通，點解尾翼唔會好似支旗咁隨風不斷擺動，而產生巨大飛行阻力，近排謎底終於解開，原來翼龍嘅尾翼有多個由一條條橫向纖維交織而成嘅晶格，強化咗尾翼，能防止佢過度擺動。

會有呢個發現，源於中大早前聯同愛丁堡大學古生物學家，研究咗4件保留翼龍尾翼未知細節嘅喙嘴翼龍（Rhamphorhynchus）標本。團隊利用雷射熒光成像技術，令尾翼標本喺黑暗中發光，從而發現尾翼上述嘅特別構造。呢項研究已經喺著名期刊eLife發表。

領導研究嘅中大生命科學學院助理教授文嘉棋認為，呢次發現有廣泛意義，期望日後可以繼續發掘翼龍成功飛行嘅關鍵，為生物仿生學帶嚟新啟示。