【明報專訊】大家平時去公立醫院睇病，知唔知醫護叫咩名呢？醫管局大會噚日討論《2023年住院病人經驗調查》結果，醫管局行政總裁高拔陞透露，出年會逐步推行「你的名字，我的關懷」運動，參考海外鼓勵醫護照顧病人時先講自己名。但佢話香港文化唔同，推行時有個位要先處理。

現時病人對有關評分較低

調查顯示，病人對於醫生、護士檢查或治療前有無介紹自己嘅評分得3.5分同2.1分（滿分10分）。醫管局話出年會逐步鼓勵醫護「報上名來」，及喺病牀、診症室同醫護名牌更清晰顯示名字。高拔陞話呢個做法喺英國、澳洲推動得好好，而自己不嬲睇症第一句都會講「我係高醫生」。但佢話外國會容易啲，尤其護理員用中文自我介紹有少少蹺口，例如喺外國可以就咁叫佢英文名Tony，「但係叫拔陞就有啲怪」。

高拔陞話九龍西聯網已經推緊，同事接受程度高，仲有小量數據顯示投訴少咗、讚賞多咗，希望快啲擴展去其他聯網。醫管局主席范鴻齡話向病人自我介紹係好自然嘅事，期望加快推行，又講笑話正因為高拔陞有介紹自己，所以「𠵱家咪做咗（行政）總裁」。