【明報專訊】中文大學校長段崇智年初提出請辭，明年1月卸任。佢近日撰文寫下臨別感言，感謝校內同事及各界支持，文中唯一點名多謝嘅，就係中大校友、財爺陳茂波，感謝佢多年嚟經常出席中大活動，關注中大發展，令中大同仁都深感榮幸。本月初中大校友會為佢搞嘅歡送晚宴，有唔同年代校友出席，睇番當晚嘅相，陳茂波都有出席，段校長就話令佢驚喜萬分，亦為嗰晚更添意義。

感謝同事付出同7年信任

段崇智前日喺新一期《走進中大》發表校長的話，以「豐收之年」為題，回顧中大今年嘅成果，包括9月成功發射首枚自主研發衛星、發起「香港青年航天創新聯盟」、喺QS世界大學可持續發展排名中保持亞洲前10名等。佢話中大今年喺人才培養、研究、創新等方面取得優秀成果，又同全球伙伴建立堅實合作，進一步提升中大喺全球高等教育界嘅影響力。

段崇智提到，中大近年致力推動教研、創新同創業，貢獻可持續發展。佢十分感謝每位員工同事嘅付出同汗水，表示「中大人同心同德，定能繼續發揮專業精神，力臻卓越」。佢感謝每位中大同事嘅付出同過往7年對佢嘅信任，「成就了今天的中大」。