【明報專訊】立法會噚日舉行午宴，宴請特首李家超、行會成員同政府高級官員。Emily留意到，枱上擺放嘅紅酒上面招紙有立法會「立」字標誌，細心睇原來係內地寧夏賀蘭山東麓葡萄酒產區出產嘅酒。立法會主席梁君彥喺午宴期間仲拎起向李家超介紹。

據聞呢隻酒係立法會訂製，今年開始用。對比立法會過去午宴，今年2月新春午宴都有過同款酒，不過「低調」無放枱面。有議員話，支酒價格相宜，味道唔錯。

梁君彥致辭時透露，立法會大樓擴建工程完成後，議員樓層出入權限已放寬，官員只要手持立法會證件可以自由穿梭唔同議員樓層，方便交流。佢又感謝政府部門喺擴建工程中緊密協作，形容係行政立法關係良性互動好例子。

蘇長荣扭親 輪椅出席

午宴有唔少議員同官員出席，其中選委界別議員蘇長荣坐輪椅到場出席，需要人攙扶上座。蘇老闆解釋佢噚日扭親，傷到韌帶，近期都行唔到。