【明報專訊】沙頭角荔枝窩深山有客家古村名為「梅子林」，當中嘅壁畫村係港產片《緣路山旮旯》取景地。前環境局長黃錦星噚日喺facebook話，有賴村民及義工，令沉睡幾十年嘅「梅子林」重現繽紛，呼籲大家支持復育老村，包括近日有義工以壁畫呈現客家柊葉圓籠大年糕。

以壁畫呈現客家柊葉圓籠大年糕

月尾「森活節」 有驅蚊塔工作坊

黃錦星並介紹「梅子林」壁畫，除咗舊壁畫，「無止橋慈善基金」上月喺梅子林社區廚房同幾十名義工共創新壁畫，涵蓋廚畫，即以食物為題嘅壁畫。佢話義工喺社區廚房嘅L形摺門以壁畫呈現咗當地客家烹調及農產，例如幾乎失傳嘅客家柊葉圓籠大年糕。

佢亦鼓勵大家參加梅子林「森活節」。今屆「森活節」喺本月28號至明年1月5號舉行，暫有「驅蚊香塔工作坊」同「瓦片禪繞畫體驗工作坊」，分別喺28號同29號舉行，當中驅蚊香塔工作坊會就地取材，利用荔枝窩田間種植嘅芳香植物製成蚊香塔。市民可於12月20號或之前經網上報名。