【明報專訊】唔少善信去到黃大仙祠會求番支籤，仲會去祠前面嘅「東華三院黃大仙簽品哲理中心」（圖）幫襯解籤師傅。簽品哲理中心現有161個解籤檔，最近世界紀錄協會頒咗證書畀中心，認證佢為「世界上解籤檔最多的建築物」。東華三院特別將證書製成碑銘，噚日舉行揭幕儀式，之後會將碑銘放喺中心內畀公眾欣賞。

揭幕儀式喺東華三院簽品哲理中心舉行，黃大仙民政專員胡鉅華、嗇色園主席黎澤森同東華主席鄧明慧都有出席。鄧明慧話，東華明年邁入155周年紀慶，會繼續推動慈善事業發展，同時不忘初心持續推動中華傳統文化同廟宇服務工作。

黃大仙簽品哲理中心前身係「黃大仙簽棚」，1956年由東華設立，到1984年斥資千五萬改建簽棚，中心最終喺1990年5月建成投入服務，將邁向35周年。