【明報專訊】本身係教大協理副校長嘅立法會選委界別議員周文港（圖）本月底離任教大，只做咗約一年半。佢同Emily講，任職期間同外地院校建立更密切聯繫，仲喺開辦新研究學院、公共行政同國家安全教育新課程等方面，有一啲成績和基礎，未來希望更集中參與政策研究，同推動更有利於官產學研四方合作嘅工作。

睇番立法會資料，周文港舊年4月2日離開嶺南大學，第二日就開始擔任教大協理副校長（大學拓展），同年8月起擔任教大應用政策研究及教育未來學院執行院長。佢噚日同Emily確認月底離任教大，暫時唔方便透露未來工作安排，亦無講原因。周文港曾擔任嶺南大學嘅中國經濟研究部副總監、潘蘇通滬港經濟政策研究所副所長、STEAM教育及研究中心總監。