【明報專訊】電影《破．地獄》累積票房已逾6000萬元（見C1版），成為城中熱話，唔少政界人物都喺社交平台分享觀後感悟。立法會議員江玉歡（Doreen）星期日帶埋男友Stefan去睇，大讚呢齣戲係「真心做給觀衆看的好電影」，睇到流淚，話許冠文飾演嘅「文哥」有啲似已過身嘅爸爸，講起爸爸呢一輩嘅人都好少會講「我愛你」，特別有感觸。

Doreen話紅磡喺其成長地，佢爸爸嘅燒臘店就喺蕪湖街，所以特別有感覺。前財爺曾俊華都讚呢齣戲「相當完美」，佢亦諗起爸爸，話爸爸為讓子女有更好嘅教育機會移民美國，但49歲時因肺癌過身。曾俊華話呢套戲探討咗超越死亡嘅各種愛同情，相信觀衆會喺劇情中睇到自己嘅人生片段，又話死亡係必經之路，要學識放低，破除心中地獄。

民主黨主席羅健熙就有啲唔同睇法，佢覺得呢齣戲可以喺「破地獄」或各種香港殯葬有更多着墨，另外有部分劇情嘅節奏有啲慢，不過佢都贊同《破．地獄》係可以攞上枱面嘅港產片。佢並諗起10多年前嘅日本電影《禮儀師之奏鳴曲》，電影都係透過殯儀業講家庭、說生死、說遺憾，都好值得推介。