【明報專訊】政府及兩間電力公司今日會公布最新電費加幅。立法會環境事務委員會噚日去咗中電龍鼓灘發電廠，但唔係去傾電費加價，而係關注中電供電穩定事宜，及電力公司推進減碳目標嘅進度。龍鼓灘發電廠4月發生電壓驟降事件，搞到有百宗困𨋢事故。中電人員噚向議員介紹，話上次事件同雷電有關，已喺發電廠和輸電塔等設施加裝避雷器「球形」裝置，話可以減低雷擊影響嘅機率。

中電並向議員展示籠網式航拍機和爬行機械人。議員田北辰對航拍機特別感興趣，讚中電用航拍機檢查廠房設備及沙井管道，可減低工人高空墮下或喺密閉空間生意外嘅風險。中電又話，已升高電廠掣房及加設防水閘、水泵及水位警報器，以應對極端天氣致水浸嘅威脅。田北辰就話，兩電出錢投資搞改善設備，資產成本高咗到頭來點都會計入加價，再轉嫁市民，所以如果再發生電壓驟降，要罰電力公司錢都合情合理。

出席參觀活動嘅議員包括事務委員會主席劉國勳及議員陳紹雄、張欣宇、劉智鵬，以及非委員田北辰、陸頌雄、邱達根和陸瀚民。