【明報專訊】港澳辦主任夏寶龍日前要求香港要建造好陸海空三個「港」，航運物流過往對香港經濟發展好重要，香港今個禮拜舉行嘅「香港海運周2024」活動，係海運及港口業界年度盛事，有逾80家海事機構舉辦超過50項業界和公眾活動，運輸及物流局預計有約14,500人次參與。今次有唔少外賓，運物局長林世雄盡地主之誼，前日安排政府船「天后」號由維港出發，載嘉賓近距離欣賞昂船洲大橋及睇葵青貨櫃碼頭運作情况。林世雄都話佢都係首次乘坐「天后」去咁樣參觀貨櫃碼頭。

大家遊完船河，噚日就參加海運周開幕禮。中聯辦主任鄭雁雄親臨致辭，佢話，中國正在大力發展新質生產力，可以預見，一系列與航運業相關嘅原創科技成果將喺呢個過程中勃發奔湧。鄭呼籲業界把握一國兩制優勢，因為香港正健步走向由治及興，迎嚟全力拼經濟、謀發展嘅最好時期，指航運企業應該做「行動派、實幹家」，叫大家乘改革創新東風，抓由治及興機遇，推動香港高端航運服務業發展，投身綠色航運中心建設。