【明報專訊】上年《施政報告》話要成立「弘揚中華文化辦公室」（下稱弘揚辦），同埋舉辦中華文化節。文體旅局長楊潤雄噚日喺中華文化節節目巡禮致辭話會喺6至9月舉行，預計受惠人數接近10萬，希望藉此提升市民嘅國民身分認同、文化自信，同時帶動人流，為經濟增添助力。佢話文化節每年設定一個焦點中國城市，聚焦顯示呢個城市嘅文化魅力，而今年嘅焦點城市就係上海，會安排上海京劇院、上海民族樂團、上海博物館嘅節目及展覽畀市民欣賞。康文署回覆話今個財政年度預留咗2000萬元籌辦中華文化節。