【明報專訊】政府統計處每3年調查香港語言使用情况，噚日喺新一期《香港統計月刊》刊登2021年嘅調查結果。調查顯示，喺家中最常講嘅語言一如所料係廣州話，但原來英語同普通話嘅比例一樣係2.1%，不過由於2015年同2018年同類調查無問同一問題，所以睇唔到升跌。至於自評英語或普通話口語能力「不足夠或完全不足夠應付日常生活」嘅人，分別有30.7%及25.3%，不過因為工作需要而認為需學習或進修英語、普通話或廣州話等語言嘅就業人士就只有20.5%，少過2018年調查嘅25.4%。