【明報專訊】唔少新界過渡房屋選址偏遠，住戶入住後要買家俬買餸可能都有困難，喺新界有4幅過渡屋地皮嘅新世界發展噚日就宣布，同周大福慈善基金、微軟香港、HKT、Pricerite實惠4間機構或企業合作，打造全港第一個過渡房屋「智慧社區」，喺創新科技、教育、醫療、緊急支援上幫吓住戶，其中有專為有需要者而設嘅「緊急支援單位」，會免費提供家居寬頻、Wi-Fi、單位設計、基本家俬同家居用品等，新世界話目標係成為首個可以「拎篋入住」嘅項目。