【明報專訊】踏入暑假，唔少立法會議員都招收實習生。教大畢業嘅民建聯郭玲麗（Lillian，中）就收咗同樣就讀教大嘅師妹（左），加入議辦做實習生。Lillian日前帶同師妹參加「中華非遺文化傳承推廣計劃」簡介會，師妹仲喺活動嘅書法攤位即席揮毫，寫咗「後勁玲麗」揮春送畀佢，玩「食字」將原文「凌厲」換成「玲麗」。Lillian話攤位嘅書法老師都稱讚實習生寫得有板有眼，Lillian非常欣喜，話會將揮春放喺辦公室留念。