【明報專訊】承載一代港人記憶嘅大坑虎豹別墅舊年尾因虎豹樂圃停運而關閉，噚日政府就宣布，虎豹別墅呢個禮拜五起會以導賞團方式重新開放，市民今朝10點起可以喺古蹟辦網頁預約，導賞團逢周五至周日及公眾假期以粵語形式舉行，每日4節，每節名額24人。古蹟辦同Emily講，早前翻新咗別墅外牆，同埋室內嘅金箔、漆油，今次重新開放會展示更多房間同文物，包括遊戲室及別墅落成誌慶禮物。