【明報專訊】立法會會議廳天花板漏水，之前Emily喺記者席聽會時都試過頭頂不時滴水。立法會主席梁君彥噚日話，秘書處同建築署趁大會休會期間已處理咗問題，佢轉述建築署解釋，會議廳外形似「飯煲」、天台似「煲蓋」，因為「煲蓋」係曲面設計，加上物料老化，增加排水渠滲漏風險，所以用咗泳池常用嘅高強度防水塗層Polyurea，再改埋去水窿嘅設計，防止淤塞。梁君彥話有信心唔會再天花漏水。