【明報專訊】沙田前區議員黎梓恩上周因宣誓無效而被DQ（取消）議席，睇佢平時文質彬彬，原來有打拳習慣。話說佢噚日參加「搏擊專業大賽」，除咗睇得出身形好fit，佢仲贏咗個獎盃返嚟，沙田前區議員陳兆陽話佢正式改名做「拳王恩」𠻹呀。黎梓恩接受Emily查詢時就謙虛笑住話，個比賽都係業餘級別、唔係專業級，佢贏咗嗰場賽事就有獎盃，又笑言要做拳王「百倍、千倍努力都唔止」，邊有咁易做拳王喎！