【明報專訊】新冠病毒疫情令全球旅遊業陷入冰封狀態，但旅發局繼續做唔少宣傳，希望疫情一完旅客再嚟香港玩。旅發局話，近排向台灣傳媒同旅遊業人士送上心意卡，上面附有菠蘿油、奶茶等港式地道美食嘅香味，勾起佢哋對香港嘅回憶。旅發局亦向東南亞傳媒同網絡紅人送上虛擬實境（VR）眼鏡，等佢哋戴住嚟睇旅發局有關香港旅遊嘅宣傳片，安坐家中都可以「遊覽」香港。