【明報專訊】全國人大會議通過修改香港選舉制度，團結香港基金噚日搞咗個交流會，邀請咗10個政商界、法律界中人出席發言，唔少與會者力撐人大做法。人稱「翟少」嘅資深大律師翟紹唐以往好少出席呢類場合，噚日佢壓軸發言，講笑話唔係要做結案陳辭，不過佢嘅發言同其他嘉賓的確與別不同。佢話由愛國者或愛港者治港係天經地義，不過唔希望因為呢啲字眼，將來嘅選舉變成「小圈子」選舉。