【明報專訊】衛生署衛生防護中心傳染病處主任張竹君成日喺鏡頭前交代疫情發展，政府噚日（2日）無開疫情記者會，原來張醫生要去高等法院為DR美容集團誤殺案作供。張醫生作供大約20分鐘後離開，之後喺升降機內巧遇一名男「粉絲」，對方好興奮咁要求同佢自拍，記者即刻提醒法院唔畀影相。男粉絲「忍到」去法院正門外面，成功同張醫生影相「集郵」，最後仲同對方打氣，講咗聲「加油」。