【明報專訊】香港警察近年着力經營facebook，但帖文內容不時受爭議；日前警察想教道路知識，話如果交通意外中無人受傷，只涉及財物損毁或動物受傷，駕駛者喺安全情况下停車，同涉事司機或物主交換姓名、地址、車主姓名、車牌號碼，就毋須向警方報告交通意外。帖文引起唔少人質疑，包括話唔報警或影響保險索償、法例列明撞到動物必須停車報警，亦有人質疑警察只係想偷懶唔做嘢。