【明報專訊】各政黨開始為9月立法會選舉搞內部初選，新民黨初選就與別不同，放寬畀黨外人參加。政圈消息傳出，曾參選2016年新界東立選嘅自由黨李梓敬有意參加新民黨新東初選，同新民黨現任議員容海恩爭。李梓敬回覆查詢時無斬釘截鐵否認，又話據佢了解如果初選贏咗，正式出戰時可以掛唔止一個政黨牌頭。新民黨初選下周四（12日）截止，李梓敬話下周有決定。自由黨黨魁鍾國斌話，一旦李梓敬參加新民黨初選，就要退出自由黨。