【明報專訊】商務及經濟發展局長邱騰華上星期二做facebook live同網民傾經濟，雖然當晚唔多人睇，但邱騰華評論「黃色經濟圈」，話以顏色區分經濟並唔係香港經濟模式，質疑「憑乜嘢去分邊個係黃邊個係藍」，言論引起唔少迴響。商台節目主持陳志雲噚日爆料，話收到消息，局長辦公室聯絡相熟朋友，叫佢哋喺直播時問啲有質素嘅問題，甚至提供埋問題範疇，例如「黃色經濟圈會唔會令人覺得煽動仇恨？如果有黃色經濟圈，點樣防止仇恨播種？」