【明報專訊】特首林鄭月娥噚日（22日）喺日本出席新任天皇德仁嘅即位儀式，網上流傳相片，顯示林鄭月娥喺儀式上用手機，畀網民話佢喺會場玩電話。相片所見，當時林鄭坐喺後排，前面幾排座位未有人入座。特首辦見到網上熱烈討論，都要回應事件，話典禮場地容許嘉賓攜帶同使用手提電話，而「特首短暫查看手提電話時，儀式尚未開始」，唔少嘉賓都未入座，亦有已到場嘅嘉賓正睇刊物同交談。對於有人憑截圖批評，特首辦話「恐怕他們是不了解情况，或是穿鑿附會」。