【明報專訊】政黨、組織不時會藉遊行、集會擺街站，可以同支持者見吓面，有時亦會籌款，噚日遊行唔少民主派立法會議員亦有喺街站同示威者打打氣，同埋派發反對修訂《逃犯條例》訴求嘅道具畀示威者，例如新民主同盟、工黨都分別製作咗印有「反送中」、「林鄭送你中，港人好陰公」嘅紙牌，等大家遊行時可以高舉嚟表達反對修例。噚日大熱天時，除咗唔少地區有補水站之外，Emily亦見到民主黨街站有義工派發濕紙巾，畀市民抹吓汗、消吓暑，相當貼心。