【明報專訊】立法會《國歌條例草案》法案委員會主席、建制派「班長」廖長江早前主持緊會議時，私下同副主席張國鈞講，如果流會「西環實係拆天」，結果被主席枱嘅枱咪收晒音，雖然張國鈞事後話無聽到「西環拆天」，但立法會嘅開會片段就錄到晒，大家亦可上網聽得到。福利事務委員會主席、民主黨鄺俊宇噚日喺facebook上載咗張相，並標註「西環拆天」，原來佢發現主席咪貼咗張貼紙，提示議員如綠燈亮起時會收音。鄺俊宇話，「咁都唔驚拆天了，好體貼。」以後喺主席枱想講悄悄話，要留意主席咪有冇着綠燈喇。