【明報專訊】港鐵星期一發生嚴重撞車事故，噚日終於將爛車拖走，荃灣線來往中環站同金鐘站嘅服務恢復正常。有網民噚日喺facebook專頁「MTR Secrets」上載咗一張相信係港鐵員工喺中環站嘅合照，當中有人舉起勝利手勢。不過唔少留言者都表示不滿，Emily問過港鐵前線車長，原來合照嘅係一班車務部管理層，但唔少前線同事都覺得，係因為好多前線工程人員同消防人員不眠不休咁拖走列車，先可以令荃灣線恢復通車。Emily都睇過唔少港鐵員工同消防員喺管道內處理列車嘅相，有唔少職員要落手落腳將架出軌列車移番上路軌，雖然佢哋無相放上網，相信乘客都會感受到佢哋嘅努力。