【明報專訊】每次禮賓府舉行開放日，都會吸引唔少市民參觀，噚日亦唔例外，開放日朝早10點開始，但開門前已有過百人等候。特首林鄭月娥先後兩次步出府邸同市民自拍交流，仲換咗兩套衫；其間又同市民一齊欣賞中樂表演，同埋同負責介紹禮賓府歷史嘅導賞員傾偈。有市民帶咗畫作到場，想送畀林太表達支持，話覺得林太好「勁揪」，放棄成個家庭去為民服務；但林太就婉拒咗收禮物。