【明報專訊】Emily前晚突然被邀請加入咗一個微信群組，「發起人」係民建聯立法會議員黃定光（象哥），31個群組成員包括發展局前局長馬紹祥、大律師馬恩國，仲有啲全國政協等，群組內一名任職地產經紀嘅女士話，歡迎大家搵佢放租放售或投資物業，仲提供埋卡片。至噚日凌晨象哥喺群組中澄清佢無建立群組，亦無邀請任何人加入，警告「未經同意擅自將他人加入群組內，非常不道德，甚至有可能犯法！請已加入此群組中人立即退出，管理此群組者24小時內刪除此群組」。