【明報專訊】周日（17日）就係一年一度嘅渣打馬拉松，噚日起一連四日跑手可以去維園攞跑手包同跑衣，但Emily聽聞唔少跑手「鬧爆」今年安排，有跑手喺社交網站話，今年有「特別安排」，全馬、半馬、10公里都只得「一條龍」，未有分組排隊，加上攞跑衫又要排過，如果排隊時候發現電郵未有二維碼，又要去詢問處處理，有人排咗3個鐘先完成。有跑手形容「慘過排急症室」、「曬足個幾鐘，非常失敗嘅安排」、「10公里完賽都仲未攞到（跑手包）」。