【明報專訊】律政司長鄭若驊噚日到立法會接受議員就UGL案質詢後，答完議員後亦主動去俗稱「咪兜」嘅傳媒採訪區回應記者提問。正當司長答完問題轉身離開時，企喺附近嘅公民黨陳淑莊（Tanya）開始嗌口號抗議，不過唔知Tanya係咪仲心繫高鐵一地兩檢議題，連續嗌錯3次「法治天敵鄭汝樺」，將鄭若驊個名同運房局前局長鄭汝樺撈亂咗，直到有民主黨議員向Tanya展示請願標語以作提醒，Tanya先察覺自己講錯，隨即講番「法治天敵鄭若驊」，事後佢都表現得有啲尷尬。