【明報專訊】民主黨3月中舉行黨慶，晚宴重頭戲當然係籌款，上周民主黨中委會就決定今年唔會邀請特首林鄭月娥、律政司長鄭若驊及立法會主席梁君彥出席。上年黨慶林太即場捐3萬蚊畀民主黨李華明（Fred）唱歌，阿Fred一直都係民主黨籌款核心人物，但佢上周得悉該黨決定唔請林太等3人後，就決定辭去籌款委員會嘅職務，今年黨慶佢亦唔會再上台唱歌籌款。