【明報專訊】港大法律學者戴耀廷上月喺台灣提及港獨嘅言論，受到中央部門、港府及建制派抨擊，有人擔心《基本法》23條會「加辣」立法，政制及內地事務前局長、港區人大代表譚志源前日就以咖喱比喻，話「我很喜歡吃咖喱，我覺得愈辣愈好，而有些人就覺得些許辣都難以承受」。自認咖喱愛好者嘅立法會議員區諾軒就叫譚志源「唔好侮辱咖喱」，話「咖喱如果淨係食得辣，份人都真係幾無taste」，因為咖喱係代表多元。區諾軒噚日喺facebook話自己成日食咖喱，認為咖喱嘅魅力，係唔同地方有好唔同特色，例如印度重香料、日本重甜味。佢話正因為咖喱咁多元，反觀23條只係「一元」，如用咖喱比喻23條，係侮辱咗咖喱，批評班建制派「剩係識加辣塞塞埋埋咩港獨違反基本法堆垃圾入去」。