【明報專訊】粉嶺高爾夫球場應否發展建屋引起爭議，工黨約10名成員噚日去球場外請願，要求政府收回球場興建公屋。上水鄉委會前主席、著名練馬師簡炳墀喺工黨示威期間啱啱揸車路過，佢落車同工黨嘅人理論，話香港仲有好多地方可以發展，叫工黨唔好騷擾高球場，「找政府麻煩，唔好找球會麻煩」，反建議政府考慮用軍營土地起公屋，仲話「去軍營（請願）記得預埋我」。