【明報專訊】港島立法會補選4名候選人噚晚出席now新聞台選舉論壇，新民黨陳家珮（Judy）喺主場環節向民主派區諾軒展示一張相，圖中側向鏡頭嘅區諾軒正焚燒《基本法》，Judy質疑對方只係口講法治。區諾軒最初兩度否認係相中人，Judy話張相係前年攝於中聯辦外，區諾軒就改口承認係相中人，但強調「嗰份嘢係一份（人大）8．31講法」。Emily噚晚再向區諾軒了解，佢承認當時係燒基本法附件三道具，但強調燒基本法唔代表唔尊重基本法。