【明報專訊】水彩畫同廣東大戲，家庭主婦同畫家，再唔係大纜都扯唔埋，水彩畫家王碧影（Fanny）係家庭主婦，仔大女大之後，自己有更多時間，於是就去追尋兒時夢想，重拾畫筆，最初開始畫花，10年前拜師專研畫人物，以水彩形式繪畫廣東大戲，仔細描繪花旦嘅造手、表情同服飾等，近日重有機會喺中環國際金融中心一期舉辦畫展，希望以畫作介紹廣東大戲呢個文化畀大眾認識。